Faustino S. Aguilar

Talambuhay

Ginamit ng mga Pilipino ang talas ng kanilang mga isip at panunulat upang makibaka sa mga mananakop. Isa sa mga ito ay si Faustino S. Aguilar na naging kasapi ng Katipunan noong panahon ng mga Kastila habang naging isang manunulat naman noong panahon ng mga Amerikano.

Para sa Bayan

Tubong Malate, Maynila si Aguilar. Isinilang siya noong Pebrero 15, 1882. Dahil sa labis na pagmamahal sa bansa, sumapi si Aguilar sa Katipunan at nakiisa sa madugong paghihimagsik laban sa mga mananakop na Kastila.

Nang makarating naman sa Pilipinas ang mga Amerikano, nanatili ang pag-ibig sa bayan ni Aguilar at inilabas ang damdamin sa pagsusulat. Naging mamamahayag siya at patnugot ng pahayagang Taliba.

Gintong Pamana

Liban sa pagiging isang mamamahayag, nakilala rin si Aguilar bilang isang nobelista. Tumatak sa mga mambabasa ang kaniyang mga nobelang hango sa mga pinagdaanan sa mga mananakop at iba pang paksa ng realismo.

Pinakadinadakila ang kaniyang nobela na Sa Ngalan ng Diyos na inilabas noong 1911. Matapang ang tema ng nobela na tumutuligsa sa mga ordeng Heswita. Sa kuwento, ang mga lupon ng paring ito ay binibilog ang isip ng mga kababaihang maykaya upang mapasakamay ang pag-aari at puri ng mga dilag na iyon.

Sa edad na 73, pumanaw si Aguilar sa Sampaloc, Maynila.

Popular Posts