| poetry
Basolmo, Apong, ta insarsaritan
kaniak
Iti abay ti paginuduan, kunam a masarakak
Itlog ti kannaway idiay bantay ti uliak
Kasamsamonan, dan-aw, waig pagsawarak
Kunam a masapul pay sagabaek bayakabak
Kimat ken dulluog, dapankot’ agriniad
Tudok dagiti rettab, allawig di agpabatubat
No kayatko nga ikutan itlog a tartarigagayak
Tallopulo ket tallo a tawen, Apong, a nagsawarak
Turong dagiti kannaway amin sinipsiputak
Umokda a kunam innak sinuksukimat
Bareng addad’tan ti babato a kalkalikagumak
Basolmo, Apong, ta indaldallotmo
kaniak
Matutudo a malem nga agkimatkimat
Itlog ti kannaway birtudko itoy a biag
Saan gayam nga idiay bantay ti pakakitaak
Igid ti dan-aw a nagpuypuyatak
Kasamsamonan a nakarudrud-akak
Kadagiti langalang, sirok ti bayakabak
Ngem naladawen, Apong, idi innak
masirpat
Itlog ti kannaway, gagasat daytoy a biag
Adun ti akin-ikut, bukoddat’ agpagpaggaak
Umok ti kannaway, di bugbugtong, agrurutap
Iti sirok ti lamisaan, siled a pumirpirak
Kuarto a naayamuom, agay-ayus ti arak.
Basolmo, Apong, ta indaydayyengmo
kaniak
Iti abay ti dadapilan, kunam a masarakak
Itlog ti kannaway idiay bantay ti uliak
Kadagiti igid ti dan-aw a pakarud-akak
Kasamsamonan, sirok ti bayakabak
Basolmo, Apong, ta indaldallotmo
kaniak
Itlog ti kannaway idiay bantay ti pakasarakak
Nasipnget a kalapaw dikakoman agang-angsab
Tagtaguoban ti aso, pagpaggakan ti wak
Ay basolmo, Apong, basolmo….
back to writing
from the regions | poetry
| home |
